2025 жылдың 29 тамыз күні Қазақстан Республикасы Конституциясының 30 жылдығына орай, Ата Заңымыздың тарихи маңызын терең түсіндіру, азаматтық ұстанымды қалыптастыру және қызметкерлердің құқықтық сауаттылығын арттыру мақсатында ұйымдастырылған «Конституцияға 30 жыл: Тарих және деректер» атты танымдық шарасына білім басқармасының, білім берудің оқу-әдістемелік орталығының, облыстық балалар мен жасөспірімдер туризмінің мамандары қатысты.
Салтанатты шара Қазақстан Республикасының Мемлекеттік Гимнімен басталып, басқарма басшысының орынбасары Қ.Н. Газимованың мерекелік құттықтау сөзімен жалғасты.
А.Ә. Қонарбаев Қазақстан Республикасы Конституциясының қалыптасу тарихындағы бірқатар маңызды мәліметтерге хронологиялық баяндама жасады.
Заң алдындағы жауапкершілік, құқықтық сана мен елге деген құрметті арттыруға бағытталған шара «Конституцияға саяхат» атты зияткерлік ойынымен жалғасты. Аталған шараға облысымыздың басқа да басқармалары мен департаменттерінің мемлекеттік қызметшілері белсене атсалысып, бейнеролик арқылы сұрақтар қойып, айтулы мерекемен құттықтады.
Шара соңында зияткерлік ойынның қатысушылары басқарма басшысының алғыс хатымен марапатталып, Н. Жантөрин атындағы Маңғыстау облыстық музыкалық драма театрында өтетін қойылымдарға билеттер табысталды.
