Білім беру ұйымдарының музей жетекшілері арасында «Өлкетану жұмыстарын ұйымдастыру тәсілдері» тақырыбындағы облыстық тәжірибелік семинары

• 28 ақпан 2023
• Оқылған саны: 694

Орталықтың 23.02.2023 жылғы №14нқ бұйрығына сәйкес, өлкетану жұмысын ұйымдастыру мен жүргізудегі музей жетекшілерінің кәсіби құзыреттілік деңгейін арттыру мақсатында ағымдағы жылдың 28 ақпан күні Ақтау қаласы, Н.Оңдасынов атындағы №5 жалпы білім беретін мектебінде білім беру ұйымдарының музей жетекшілері арасында «Өлкетану жұмыстарын ұйымдастыру тәсілдері» тақырыбында облыстық тәжірибелік семинар өткізілді. Аталған шараға 36 білім беру ұйымының музей жетекшілері қатысты.

Семинарда Ә. Кекілбайұлы атындағы Маңғыстау облыстық тарихи-өлкетану музейінің қоғаммен байланыс менеджері Наушабаева Алия Асқарқызы: «Музейдің қоғамдағы рөлі», С. Қондыбай атындағы №22 мектеп-гимназиясының музей жетекшісі Мамедалиева Гульмира Дүйсенгалықызы: «Серікболтану: кеше, бүгін, ертең», М. Әбдіхалықов мектеп-гимназиясының музей жетекшісі Бимағамбетова Ақерке Набиқызы «Мектеп музейі – рухани құндылықтар орталығы», Қарақұдық жалпы білім беретін мектебінің музей жетекшісі Бесінбаева Жания Өмірбайқызы: «Музей – тарихтың айнасы» тақырыптарында баяндамалар оқыды.

Бағдарлама бойынша А. Наушабаева өзінің баяндамасында Ә. Кекілбайұлы атындағы Маңғыстау облыстық тарихи-өлкетану музейінің бөлімдері, өлкетану бағытында атқарылып жатырған іс-шаралары және білім беру ұйымдарының білім алушыларына музей мамандарының дәріс өткізуге даярлығы туралы атап өтті.

Г. Мамедалиева өлкенің географ ғалымы, мифология саласының зерттелуіне үлес қосқан С.Қондыбай құрметіне ашылған мектеп музейінде атқарылып жатырған «Серікбол-Ғалам» ғылыми-мәдениеттанымдық эстафетасы, «Серікболтану» тақырыбындағы факультатив, үйірме жұмыстарымен таныстырып, музейге 3D экскурсиясын жүргізді.

А. Бимағамбетова журналист, публицист М.Әбдіхалықовтың атына берілген музейдің құрылуы, экспозициялық көрінісінің жасақталуы, жинақтаған құжаттар мен жәдігерлер туралы еңбектерімен таныстырып, музейде жүргізілетін 3 тілді экскурсиясы бейнеролигін көрсетті.

Ж. Бесінбаева Қарақұдық мектебінің өлкетану бағытындағы музейі тарихымен, ерекшелігімен, жүргізілген іздеу-зерттеу жұмыстарында табылған жәдігерлерімен, сондай-ақ, музейді жасақтау барысындағы еңбектері жарияланған мақалалары мен баспадан шыққан кітаптарын таныстырды.

Сонымен қатар, орталықтың туризм-өлкетану бөлімінің жетекшісі Қ. Сұлтан музей құжаттарының рәсімделуі, экспозициялық көрінісі, қазіргі мектеп музейлерінің деңгейі туралы сөз қозғап, құжаттардың үлгілерімен бөлісті.